မူလဘူတရပိုင်ခွင့်များ ကွန်ရက်၏ ဖက်ဒရယ်ပြည်ထောင်စုနှင့် ပြည်နယ် သို့မဟုတ် ဖက်ဒရယ်ယူနစ်များ၏ ဖွဲ့စည်းအုပ်ချုပ်ပုံဆိုင်ရာ အခြေခံဥပဒေနှင့် ပဋိညာဉ်စာတမ်းများ (Constitutional Documents) ရေးဆွဲခြင်းလုပ်ငန်းစဉ်များဆိုင်ရာရပ်တည်ချက်စာတမ်း

မူလဘူတရပိုင်ခွင့်များကွန်ရက် Bill of Rights Network (BORN) သည် မူလဘူတရပိုင်ခွင့်များကို လေးစားလိုက်နာသည့် ဖွဲ့စည်းပုံအခြေခံဥပဒေစနစ်ကို ကျင့်သုံးအုပ်ချုပ်ခြင်းဖြင့် တရားမျှတမှုနှင့် ညီမျှမှုတို့ရှိသော ငြိမ်းချမ်းသာယာသည့် လူ့ဘောင်တခု ဖြစ်ထွန်းစေနိုင်မည်ဟု ယုံကြည်သည်။ ဤ ရပ်တည်ချက်စာတမ်းသည် ယင်းယုံကြည်ချက်အပေါ် အခြေခံ၍ ဖက်ဒရယ်ပြည်ထောင်စုနှင့် ပြည်နယ် သို့မဟုတ် ဖက်ဒရယ်ယူနစ်များ၏ ဖွဲ့စည်းအုပ်ချုပ်ပုံဆိုင်ရာအခြေခံဥပဒေနှင့်ပဋိညာဉ်စာတမ်းများ ရေးဆွဲသည့်လုပ်ငန်းစဉ်တွင် လူသားတဦးချင်းသော်လည်းကောင်း၊ အုပ်စုလိုက်သော်လည်းကောင်း ရရှိ ထိုက်သော မဖြစ်မနေထည့်သွင်း ပါရှိသင့်သည့် မူလဘူတရပိုင်ခွင့်များကို အာမခံချက်ပေးနိုင်သည့် ပြဌာန်းချက်များကို အကြံပြုတိုက်တွန်းဖော်ပြအပ်သည်။ ထို့အပြင် ရေးဆွဲသည့်လုပ်ငန်းစဉ်တွင်လည်း သက်ဆိုင်သူများအားလုံး၏ လိုအပ်ချက်၊လိုလားချက်များကို လေ့လာဆန်းစစ်၍ အကြံဉာဏ်များရယူ ခြင်းနှင့် တိုင်ပင်ဆွေးနွေးညှိနှိုင်းမှုတို့ကို စနစ်တကျပြုလုပ်ရန်လည်း လိုအပ်မည်။

‍